Banagbanag

d inhi ning gamayng isla isabwag ko ang akong kamtangan nga dili ug dili gyod maangkon sa uban dinhi ning islaha ko ikupot ang akong karaang gamot aron dili ug dili ako hikalimtan dagan ug tuyok sa panahon sugdan ko niining lumot nga maoy saksi sa tanang lakang  sa akong milahutay nga kinabuhi uban sa mga balas sa baybayon nga maoy midapig kanako sa akong mga pag-antos aron sud-ungon ko ang pahiyom sa adlaw igo na ang akong kabatan-onan diin wala gyod gihikaw kanako karon nga nia na ako sa akong pagsalop akong mga sanga moalok nas yuta akong mga dahon paliron nas hangin   hain na ba kamo kay mikunot na ang adlaw og pinaabot kaninyo    

                                                                             ang   kanipis sa imong siyagit miinat sa kataposang hunat sa alambreng milibkas sa imong dughan

  Ilusyon sa Arte Ni Jovanie B. Garay Ang balak miuban kanato dinhi sa kalibotan. Gikan sa pagkahimugso sa mga tanom, mga hayop, gagmay ug dagkong butang, naay kinabuhi ug walay kinabuhi, hangtod diin gihiusa ang mga panganod ug mga bituon, dihay balak. Sa pagkatinuod, ang magbabalak walay katungod angkunon niya ang mga ritmo, harmonya, kaisipan, ug ang mismong pulong nga naa gipadayag sa iyang balak, tungod kay dili kini iya. Iya kini sa kalikopan nga maoy mibugkos sa mga pisi nga maoy tinubdan sa atong kinabuhi. Naingon lang kitang mga magbabalak sa maryonet nga miuyon sa mando sa mga tudlo sa usa ka maryonista. Ang tawo gikaluhaan og pagbati. Tungod niini, nahimo kitang mensahero sa gugma, kasakit, kagul-anan, kagawasan ug kalipay. Misulti bitaw niini si Omar Khalid, sa usa sa among diskusyon sa bag-ong panagtigom sa mga manunuwat sa Sunday Literary Club (Ang pundok gikonsiderar nga bag-ong akademya sa mga manunuwat panahona sa pandemya) nga ang magbabalak usa sab ka propeta.

  Ang Yawa Tumoy sa Atong Dila Ni Jovanie B. Garay (2 nd place in LUDABI-Valencia Tigi Sinulatay 2020)     “Yawa, kinsa ba gud ning yawaa ni? Nakalimot gyod kos iyang ngan!” matod pang Pangulong Duterte sa usa sa iyang mga pakigpulong diha atubangan sa taga medya. Ug midugang siya: “Kabalo mo, kaming mga bisaya, sa yawa ra mi taman. Kanang akong “ putang-ina”, di man na gikan namong mga Bisaya. Ila na sa mga Batange ñ o nga among nakat-onan sa mga gagmay pa mi.” Mipahiyom siya. Kaming mga Bisaya, duna gyod miy dila sa Yawa. Motuo kag sa dili, kining dilaa maoy among lumad nga kaliwat. Kining klase sa pagpamalikas, diha na ni tumoy sa among dila sukad pa kaniadto. Gani, mao na kini ang among kulturanhong kabilin gikan sa among mga katiguwangan. Apan mao lagi, dunay mga langyaw sa among kultura nga naa namo dinhing taga Mindanao. Wala pa gyod sila makaila unsa kadaghan ang among mga pamalikas dinhi. Gikan sa pisteng yating animal nga kolerang buang paingon sa ispidno, kompl

  Elehiya sa Paglaom Ni Jovanie B. Garay   pagmaya nga linghod pa ang adlaw di matungkad ang lubnganan aron buntogon mo ang kamatayon gaksa ang hangin nga makapaigking sa imong kalag makapangagho sa mananabtan makapangawot sa alimpo sa mananagna   salom sa dagat ug sayri diin gikan ang kaparat niini aron tul-iron mo ang bakak nga kamatuoran tam-is-pait man diay ang kinauyokan sa pasipiko diin mopahulay ang naglatagaw nga kalanggaman kansang awit motagbaw sa giuhawng mga balod   lupad, lupad, susama sa abog maoy binhi nga gisabwag sa kapanganoran migitib misupang nahimugso ang mga balas sa baybayon diin ikaw miyarok og bino ilawon sa bulan   tun-i ang sambingay, mao kini ang awit sa balak ngulngol nga samad, tinubdan sa pagkat-on tunla ang luha aron mohikyad ang biyuos sa rosas diha sa imong kalimotaw ang subayanan sa imong damgo   kon ugaling mahisalaag kas imong mga lakang hinumdoming ikaw ang mipaturok sa kabituonan lakaw, pagmaya

  Kining Hikot sa Atong Hawak  ni Jovanie B. Garay   Gihiktan nato ang atong hawak Sa tanud nga kita ray nasayod Ug nanuroy kitang duha sa plasa Sa dapit diin namungingi ang unang biyuos sa rosas Ang usa ka dupa nga atong gilay-on Maoy gintang sa atong panaad Bisan pa og hasmagan sa hawak sa katilingban (kay kuno ang atong gipasibaw gugma-gugma lang Pagbating mipilit nga gatas ngilit sa atong wait) Mangatawa gihapon tas ilang tinguha—sa ilang mga bahakhak Human nila gitadlas sa pagkabugto ang atong hikot Kita ray nasayod, kita ray mitakdo Namangon kitang duha ug namapha sa atong mga pangos Apan dihay hawak nga sapsingon puti ug lawom Nakahuna-huna kong badbaron kanang imong hikot Kay namituon ang lungag sa dagom nga gisursi sa iyang pusod Sa akong pagbadbad, imo akong gitutokan Ug imo akong gitunolan sa gunting nga ako ray nasayod